IKTen erabilera areagotu egiten da egunetik egunera eta horrek berrikuntzak eskatzen ditu hezkuntzaren esparruan, ikasgelako ohiko praktika didaktikoen baligarritasuna zalantzatan jarri eta , agian, praktika horiek beste norabide berri batzuetarantz eraman behar izateraino, zientziaren didaktikarren ikerketetan oinarritutako proposamenen arabera.
Azken urteotan asko entzuten ari gara IKTek ekar ditzaketen onurei buruz. Gehienetan, topikoz beteriko mezuak dira iristen zaizkigunak eta, nire ustez, benetako arazoari ez diogu behar bezala heltzen. Zein da, bada, benetako arazoa?, galdetuko duzue. Ene uste apalean, benetako arazoa irakasleon jarrera da. Arazo latza, gainera. Azter dezagun azken urteotan irakasleon jarrera gai horrekiko.
Hona hemen IKTeroak blogean aurkitutako artikulu interesgarri bat. Bertan, 80. hamarkadatik hona irakasleek IKTen inguruan izan duten jarrreraren inguruan hitz egiten dut autoreak. Bere hitzetan, irakasleen baitan dago eskura dituzten baliabideei behar bezalako etekina ateratzea edo ez, baina badirudi orain arte baliabide horiek ez direla behar bezala aprobetxatu.
Autorearen ustetan, arazoaren gakoa irakasleen jarreran dago: beldurra diote ezjakintasunari, beldurra aldaketari, beldurra IKTetan ikasleekiko duten posizio edo ezjakintasunari. Baina, funtsean, benetako beldurra beste gauza bati diete: irakasle-ikasle ohiko rolen aldaketari.
IKTeroak Jokin Lacalleren lehen bloga da. Ikten inguruan aritzen da Ordiziako Jakintza ikastolan irakasle den botikarioa. Blog honetara jolaus.com orrialdetik iritsi nintzen eta oso interesgarria deritzot gure langairako.
IKTen inguruan hitz egiteaz gain, masterrean ikusitako hainbat kontzeptu aipatzen dira bideo honetan, hala nola, autokritika, sormena, interdiziplinaritatea, proiektu eta jokuetan oinarritutako irakaskuntza, edota administrazioaren rola. Ondorioa: sistema moldatu behar da IKTetara, eta ez alderantziz.
Gaur egun eskolaren eginbeharra ezin da IKTak irakastera edo IKTen bidez irakastera mugatu. IKTek gizarte eredu berri bat sortu dute: informazioaren gizartea; eta eskolaren erronka da, hain zuzen, ikasleei ingurune berri horretan murgiltzen laguntzea.
IKTek digitalizazioa, gehiegizko informazioa, eta ikus-entzunezkoaren eta irudiaren nagusitasuna eragin dituzte, besteak beste. Testuinguru horretan, irakasleek jada ezin dute edukiak azaltzera mugatu, eduki eta informazio horiek aurkitzen, ordenatzen, prozesatzen eta erabiltzen irakatsi behar diete ikasleei.